ភ្នំពេញ៖ នាយករដ្ឋមន្រ្ដីនៃកម្ពុជា សម្ដេចតេជោ ហ៊ុន សែន នាព្រឹកថ្ងៃទី២៤ ខែកុម្ភៈ បានចេញសារក្នុង Channel Telegram សម្តេចបញ្ជាក់ឱ្យដឹងថា ថ្ងៃនេះគឺជាខួបលើកទី៤៤ ឆ្នាំនៃការជួបគ្នាឡើងវិញរវាងសម្តេច និងសម្ដេចកិត្តិព្រឹទ្ធបណ្ឌិត ជាមួយនឹងកូនប្រុសដែលមិនបានស្គាល់មុខគ្នា តាំងពីថ្ងៃទី២៤ ខែកុម្ភៈ ឆ្នាំ១៩៧៩ ដល់ថ្ងៃទី២៤ ខែកុម្ភៈ ឆ្នាំ២០២៣។

សារសម្តេចឱ្យដឹងថា៖ «ថ្ងៃនេះ២៤ កុម្ភ: ២០២៣នេះជាខួបលើកទី៤៤ឆ្នាំនៃការជួបគ្នាឡើងវិញរវាងខ្ញុំនិងភរិយាខ្ញំជាមួយនិងកូនប្រុសដែលមិនដែលបានស្គាល់មុខគ្នា (២៤កុម្ភ:១៩៧៩ ដល់២៤កុម្ភ: ២០២៣) បន្ទាប់ពីការជួបគ្នាចុងក្រោយនៅថ្ងៃ១៨ មិថុនា ១៩៧៧ មុន២ថ្ងៃដែលខ្ញុំចេញដឹកនាំការតស៊ូវាយពួក ប៉ុល ពត នៅថ្ងៃ២០ មិថុនា ១៩៧៧»។

សម្ដេចតេជោបានរម្លឹកថាសម្ដេច និងភរិយា ក៏ដូចជាប្រជាជនកម្ពុជានៅទូរទាំងប្រទេស សុទ្ធតែជួបរឿងប្រហាក់ប្រហែលគ្នានៅក្នុងរបប ប៉ុល ពត និង ដើម្បីរម្លឹកដល់រឿងអតីកាល សម្ដេចបានចេញផ្សាយចេញនូវសៀវភៅគូព្រេងមិនព្រាត់ដែលអានដោយកញ្ញា ម៉ង់ ចាន់កញ្ញា តាម channel Telegram របស់សម្តេចផ្ទាល់នេះ។

សម្ដេចតេជោ ហ៊ុន សែន បានបន្ថែមឱ្យដឹងថា Channel Telegram សម្ដេចនឹងចាក់ផ្សាយផងដែរ នូវខ្សែភាពយន្តភាគរឿង «កូនប្រុសក្រោមពន្លឺព្រះចន្ទពេញបូណ៍មី» ចាប់ពីថ្ងៃទី២០ ខែមីនា ឆ្នាំ២០២៣ ខាងមុខគឺផ្សាយបន្ទាប់ពីទូរទស្សន៍ចាក់ផ្សាយក្នុងរង្វង់មួយម៉ោងក្រោយ៕